کا ئنات ارضی ایک البم ہے-تو عورت اس البم کی سب سے حسین تصویر ہے- اس سے حیات کے رنگ نکھرتے ہیں-گلوں پر شباب آتا ہے- شاعروں کے نغموں میں لطف پیدا ہوتا ہے- مصور کے قلم میں جان پڑتی ہے- ایوان حیات سج جاتے ہیں- تاروں کو ضیاء ملتی ہے- عورت بہار کا حسیں روپ ہے- عورت ستاروں کا نور لے کر آئی ہے-سورج کی تاب لے کر آئی ہے-عورت کا وجود زندگی کے وجود کا اثبات ہے-عورت کو دیکھ کر خدا کے حسن کا ادراک جاگ  اٹھتا ہے

اقبال نے کیا خوب کہا ہے وجود زن سے ہے تصویر کائنات میں رنگ            اسی کے ساز سے ہے زندگی کا سوز دروں عورت انسانی نسلوں کی تخلیق کی ضامن ہے- عورت تو ماں بھی ہے ، بہن بھی ہے ،عورت تو بیٹی بھی ہے ، بیوی بھی ہے عورت ماں ہو تو اس کے قدموں تلے جنت ہوتی ہے- بہن ہو تو مرد کی غیرت ہوتی ہے- بیوی ہو تو سکون قلب و جان ہوتی ہے- بیٹی ہو تو قرا ة العین ہوتی ہے-حضرت فاطمہ ہوتی ہے- رابعہ بصری ہوتی ہے- عائشہ صدیقہ ہوتی ہے-جو محمد بن قاسم ، خالد بن ولید ، محمود غزنوی ،شہاب الدین غوری جیسے مجاہدوں کو جنم دیتی ہے-عورت پھول کا نکھار، بلبل کا ترنم ، نہروں کی روانی اور کلیوں کی مہک لے کر پیدا ہوتی ہے- اگر عورت نہ ہوتی تو یہ دنیا بے رنگ اور بے رونق ہوتی- عورت تو آنکھ کی ٹھنڈک ہے-دل کا سرور ہے- زخموں کا مرہم ہے-دکھوں کا مداوا ہے- تنہائی کی ہمدم و رفیق ہے-مصیبت میں معاون ہے- نسل انسانی کے بقا کی ضامن ہے

اگر عورت نہ ہوتی تو تصویر کائنات کچھ اور ہوتی ، یہاں نچھاور ہونے کی ریت نہ ہوتی- کسی وابستگی کا کوئی جواز نہ ہوتا- یہاں ماں کو مامتا نہ ملتی اور راتوں کو جاگنے والی آنکھیں نہ ہوتیں- انسان کے کسی زخم کے لئے کوئی مرہم نہ ہوتا ،دکھ درد کی پہچان نہ ہوتی ، پتھر ہرتے انسان نہ ہوتا- عورت کے بغیر زندگی ایک سزا کا نام ہے-اس کارزار حیات میں فیصلہ کن حقیقت عورت ہے

 اوپر